俗語話，家有一老，如有一寶。講係咁講，可惜早就冇呢支歌仔唱嘞。係人都知，港府安老政策天殘地缺，連安老宿位亦長期供不應求，導致問題多多，家陣仲衰到爆出安老院虐老醜聞，講起真係可悲！
係咁嘅，大埔一間被譽為六星級嘅豪華老人院舍，被踢爆職員為長者沖涼時，居然將佢哋推出露天平台剝光豬，無遮無掩。正如附近住客話齋，呢個情形已經持續多年，無論烈日當空，抑或寒風凜凜，職員都係咁樣對待長者。唔怪得有住客講到傷心落淚，話老人家冇晒尊嚴同私隱，根本就係虐待。
最無奈嘅係，入住呢間院舍嘅老人家，大部分缺乏自理能力，就算想投訴都表達唔到，有苦自己知。事件曝光後，院舍一味推說唔知情，話已警告有關職員喎。社福界人士就講得啱嘞，社署監管不力，就算查到院舍有違規情況，最多發警告信了事，連檢控都少，遑論釘牌。院舍有恃無恐咯喎，虐老又有乜出奇吖。
點解搞成咁？原因很簡單，港府資助宿位嚴重不足，萬一院舍被釘牌，社署就要搵地方接收長者，所以咪詐傻扮懵，當睇唔到囉。社署話就話有突擊巡查，但只係睇吓文件同衞生狀況，加上唔少院舍「神通廣大」，可以預早知道巡查日期，事前「執靚個場」，巡查好似做騷咁，純粹掩人耳目嘅咋。
香港自詡國際大都會，光天化日下發生虐老事件，唔止係悲哀，簡直係恥辱！講到尾，港府卸責，對安老問題坐視不理，根本就係罪魁禍首。目前有超過三萬一千名長者輪候資助院舍，但宿位得二萬幾個咁大把，平均輪候時間長達三十五個月，搞到每年都有幾千名長者輪候期間含恨而終。最離譜嘅係，呢邊有長者冇宿位，嗰邊有宿位又冇人住，社署錯配資源，部分宿位入住率偏低，有宿位空置長達五年，問你服未。
港府明知宿位供不應求，唔係諗辦法增加供應，反而一味諗縮數，唔係叫人「居家安老」，就係「北上安老」，但就乜嘢配套同支援都冇，即係叫老人家食自己啫。好似「長者社區照顧服務券試驗計劃」咁吖，多達四分之一參加長者冇用過服務券，就知道計劃幾咁不切實際。
講起真係諷刺，香港係富裕城市，港府錢多到發霉咁滯，偏偏好多基層長者孤苦無依，有老人家靠執紙皮維生，有老人家報細年齡做保安招來牢獄之災，同雨果筆下嘅悲慘世界冇乜分別。港產官僚如果仲有良心嘅，唔該負番起安老責任吖！