政情:方文雄拒科水細仔創業

協成行董事總經理方文雄(David)嘅細仔啱啱大學畢業,早前David仲專程飛去美國加州參加畢業禮。方家二公子完成商科學位,打算搞IT創業,不過David就斬釘截鐵話,唔會畀錢阿仔創業喎!

盼兒自力更生

David話,畀筆錢兒子搞生意係好簡單嘅事,但佢擔心兒子慣咗伸手拎錢,將來一有風浪來到,就唔識得自力更生。佢唔想寵壞囝囝,所以狠下心腸,叫佢靠自己賺錢創業。

David又以身作則話,當年爸爸方潤華對佢教導相當嚴厲,佢大學畢業後喺美國一家地產公司打工十年,才返港打理家族生意,即使返公司工作亦無特權。

有次David放大假到新加坡旅行,但未出新加坡機場就收到爸爸電話急召佢回港,因為當年香港股市大跌,佢惟有即刻搭夜機返嚟香港,好彩港股好快就回穩番嘞!

第一手消息請下載on.cc東網iPhone/iPad/Android/Windows Phone Apps