政情:八網難逃:民記蛇齋餅糉變護膚品

每逢選舉臨近,各方蛇齋餅糉就會出動。民建聯(民記)成員兼北區區議員劉國勳太太呂迪明近日被發現喺葵青區梨木樹嘅屋邨,大派某品牌嘅淨白補水納米防曬乳液,仲喺包裝盒貼上有佢嘜頭嘅貼紙,莫非為咗氹女選民開心,蛇齋餅糉也升呢?

劉國勳老婆似再戰區會

呂迪明回應話,早前朋友畀咗幾箱乳液,佢見區內清潔女工日曬雨淋好辛苦,所以先派畀佢哋以表關心。

呂迪明曾經喺二○一一年區議會選舉出選梨木樹區,挑戰現任荃灣區議員陳琬琛(圓圖)失敗,依家動作咁積極,唔通係想捲土重來,再向陳琬琛挑機?呂迪明就話冇諗過呢啲嘢,一切隨緣咁話。我哋問過相關嘅護膚品公司,證實早前確曾送出一大批非賣品畀社區團體,所以輾轉落到呂迪明手中都唔出奇。

第一手消息請下載on.cc東網iPhone/iPad/Android/Windows Phone Apps