政情：新民黨政改民調惹質疑
政改最快下月底交畀立法會表決，新民黨尋日就公布政改民調，問市民支唔支持政改方案，結果超過五成人支持。不過呢份問卷出爐就惹來質疑，首先今次民調數據冇加權，又話喺全港三十個地點進行，但唔包括九龍東及九龍西進行街頭訪問。新民黨主席葉劉淑儀（葉劉）解釋，好多民調都冇加權，又話大學民調話有加權都係「講個信字」喎！葉太搞民調都搞到問題多多，唔知係咪年初被麒麟撞到，搞到諸事不順呢？
僅靠地區椿腳進行
是次民調於上月廿七日至今個月八日，喺新民黨三十個地區樁腳，即港島、新界東及新界西，以街頭問卷訪問二千七百幾人，結果有五成三人支持政改方案，一成七人反對。五成一人認同立法會要通過方案，一成八人唔認同。如果方案喺一七年後優化，合共有六成七人認同通過方案。問到政改方案否決邊個要負責，認為係泛民嘅五成三，特區政府要負責嘅有三成六，建制派則有一成，但就冇「中央政府」選項，只有「其他」。
對於今次民調喺街頭進行，未有加權處理，葉劉承認民調有self-selection bias（自我選擇性偏差），又話民調都有偏差，唔係絕對準確，只係作參考之用喎！佢又話英國大選選前民調都同結果差好遠。至於問卷唔加入「中央政府」選項，葉劉竟然話，其他民調已經問過呢個選項，「睇吓有冇人自己講『中央』」。
學者批代表性好低
理工大學社會政策研究中心主任鍾劍華就話，新民黨民調搵自己樁腳做民調，若果唔係隨機抽樣，就算加權都不足以反映實況，所以「代表性好低」，迴避咗統計方法上有意無意疏漏之處，「有少少唔妥」。鍾sir話，英國大選民調失準，係因為有選民想誤導對家，同政改民調比較可以話係「橙同蘋果」咁比，比喻不倫不類。至於缺少「中央政府」選項，佢就話呢個係市民「明顯有可能」揀嘅選項，唔加確係令人摸不着頭腦。