中環出更：佳叔倒米 譚志源發晦氣
政改進入關鍵時刻，各界都豎起耳仔，睇吓今次有冇資深建制派擔任「中間人」角色，幫中央傳遞訊息或放風測試水溫。早前中央政策組前首席顧問劉兆佳（佳叔）話，普選特首只係參考材料，中央對特首先有實質任命權。政制及內地事務局局長譚志源尋日被追問時，一反唔評論個別人士言論嘅官腔，好認真寸爆佳叔講嘅嘢只係個人意見喎！
「鍾意點講就點講」
喺立法會一個討論政改嘅小組委員會上，泛民議員捉住佳叔言論問譚志源點回應。譚志源話，佳叔唔係政府官員，又唔係基本法委員會委員，更加唔係中央官員，所以佢講嘅嘢只係代表個人，當然唔係官方立場啦。譚志源仲有啲晦氣話，佳叔「鍾意點講就點講」，睇嚟佢對佳叔倒政府米都幾不滿。
會上議員陳偉業（大舊）亦都玩嘢，發言時突然爆出一句「你阿媽」，仲問小組委員會主席譚耀宗（譚Sir）呢句係咪粗口，藉以反擊上周譚Sir以講粗口為由將參加公聽會嘅市民趕離場。譚Sir冇直接回應呢句說話係咪違規，只係叫大舊發言唔好離題。
卓妮