中環出更：舊手機轉贈親友 王庭聰唔怕洩密
智能電話款式推陳出新，唔少人頻頻追新款換機，唔知城中名人點樣防範舊手機內嘅個人資料外洩呢？香港福建社團聯會副主席王庭聰話，佢嘅舊手機多數會送畀親友用，所以唔使怕。保良局前主席鄭錦鐘（Eric）就話會保留舊手機以備不時之需，唔會拎去賣，仲話舊手機擺擺吓，可能變成古董添！
早前卓妮喺馬場見到一班名人，講起最近有手機作業系統被踢爆，即使於放售手機時回復原廠設定，但都有機會被修復，令個人資料及相片外洩。王庭聰話，雖然佢部手機唔係用上述所講嘅作業系統運作，不過佢自認冇咩唔畀得人睇，光明正大，就算係相片都係同親戚朋友一齊影，唔緊要喎！
郭詩慧與夫減上載兒照
有經營資訊科技及電腦配件產品代理嘅Eric就話，唔會將舊電話拎去賣，佢笑言擺擺吓唔止可能變古董，屆時想修復番啲資料都未必搵得番嗰種舊技術喎！
講到手機私隱，早前有團體關注年輕父母鍾意將小朋友嘅相上載至社交網站，小朋友細細個唔識反對，將來又未必能夠刪除，可能會嬲一世添！莎莎主席兼行政總裁郭少明女兒郭詩慧及女婿陳振邦就話，BB仔個個差唔多樣，隨住兒子慢慢長大，佢哋就少咗擺佢啲相上網，除咗間中有朋友聚會先會上載，但都係自己朋友睇，冇所謂啦！
仁愛堂前主席史立德就搞笑話，佢嘅情況啱啱相反，佢冇玩社交網絡，所以冇機會發放子女照片，反而係仔女不時將同佢嘅合照放上網喎！
卓妮