古人教落，「國勢之強弱，繫乎人才。」香港發展停滯不前，競爭力每況愈下，其中一個主要原因就係缺乏人才。今時今日，專業人才固然短缺，連清潔、洗碗等基層職位一樣請唔到人，你話點搞呢？正如「東方報業民意調查」顯示，大部分受訪者認為多個行業出現人手荒，反映人口老化，青黃不接。
香港人才荒究竟有幾嚴重？睇吓公立醫院就知道。公院醫護人員不斷流失，尤其專科更加係十個煲七個蓋，病人手術閒閒地等幾年，隨時小病拖成大病，大病拖到冇命，都咪話唔大鑊。醫管局近日宣布聘請四百多個專科培訓醫生，比舊年大增近四成，表面睇可以填補部分空缺，但實際成效有幾大仲要睇過至知，事關專科醫生培訓需時，加上私院重金挖角成風，隨時得個吉嘅咋。呢，「東方報業民意調查」顯示，三成四受訪者指醫管局後知後覺，遠水不能救近火；三成三人認為已形成惡性循環，影響服務質素；兩成一人直斥醫管局管理不善。
除咗醫療，IT界亦係人才荒嘅重災區。有跨國電腦保安公司大呻請人難，即使有合適人選，亦往往因為對方叫價太高而卻步，而肯應聘嘅人就良莠不齊，經常揀唔落手。難怪香港科技產業不成氣候，唔止畀新加坡拋離九條街，連內地城市亦遠遠超越香港。正所謂，一分耕耘，一分收穫。港府對大學科研投入少之又少，唔肯落本投資，又點可能出到人才吖。正如上述調查顯示，四成四人批評政策未能配合創新科技發展；兩成九人認為港府培訓不足，證明市民眼睛係雪亮嘅。
嗱，咪以為淨係專業職位難請人，基層職位亦唔好得幾多咋。最無奈嘅係，家陣連俗稱「豬肉佬」嘅街市賣肉刀手，都面臨新血不足嘅困境，部分從業員年過七十仲要頂硬上。飲食業仲誇張，由廚房、樓面到洗碗，通通人手不足，有食肆甚至被迫提早收工甚至被迫結業，問你服未。
講到底，香港之所以搞到百業凋零，行行缺人，皆因港產官僚目光短淺，眼高手低。冇錯，港府吸引人才計劃多多，一時輸入專才，一時又吸引港二代回流，講到天花龍鳳，可惜效果有限。鬼咩，香港產業結構單調，唔係金融就係地產，人才嚟到都未必有用武之地，加上香港居住環境惡劣，空氣差，租金貴，爭拗多，係人都避之則吉喇。四成三人批評港府欠缺長遠人口政策，兩成八人直斥港府唔重視人才培圳，唔係冇道理o架。
始終都係嗰句，得人才者得天下。香港人才短缺，競爭力被深圳爬頭，有乜出奇吖！