政情：史顏景蓮搞籌款趣味不絕
近年本地經濟環境一般，慈善團體想要籌多啲善款，就要多花心思，諗吓新計。仁愛堂主席史顏景蓮（Kimmy）就有好多創新諗法，打算喺中環舉行推超市購物車比賽，一來籌款，二來宣揚環保。
Kimmy話，香港人平日工作營營役役，運動時間唔多，積埋唔少壓力，所以今屆仁愛堂首個慈善活動於上星期舉行，就揀咗以運動形式進行，做善事同時有益身心。
Kimmy又話，每年仁愛堂都會有十個大型籌款活動，所以佢哋隨即又諗到下個活動嘅新點子，就係舉辦全港首個以超級市場購物車為主題嘅大型慈善活動，並加入運動元素與民同樂，遲吓仲有時裝表演等，總之夠晒健康及趣味。