適逢呢幾日係長洲太平清醮，今日更加會有一年一度嘅搶包山比賽。有「公職王」之稱嘅監警會前主席、最低工資委員會主席翟紹唐尋日出席電視節目時，就以熱爆嘅搶包山比喻政改，話唔可以因為唔喜歡最下層嘅包，就堅持只拎放喺包山最上面嘅包，勸告泛民爭取普選唔可以一步登天。
本身係資深大律師嘅翟紹唐承認，自己都唔係好鍾意目前嘅政改方案，不過「千里之行，始於足下」，如果唔踏出去就無法向前走，呼籲市民先接受「袋咗先」。佢又話，喺人大「八三一」框架之下，提名委員會嘅組成方法仍然有好大嘅修改空間，問題係過去大家都冇把握機會討論。
翟紹唐慨嘆香港喺過去幾年嘅發展停滯，已淪為「亞洲四小龍」嘅龍尾，被韓國及新加坡超越，而議會卻用大量時間去爭拗。佢希望泛民議員月底喺深圳與中央官員會面時，能夠真誠討論、尋求共識。