政情：工記屋漏逢夜雨
香港唔少政黨都面對青黃不接嘅問題，就算係貴為全港最大工會嘅工聯會（工記），同樣有新舊交替危機。據工記某領導層透露，最近有唔少後生仔對工記印象麻麻，更遑論加入服務工會。如果情況延續下去，將來都唔知搵邊個接班。下年就係立法會選舉，黨內青黃不接，擔心日後新舊交替可能出現問題。話口未完，最近工聯會立法會議員陳婉嫻幫逾期居港嘅無證男童懷仔出頭，引起唔少風波，唔知呢一役會令到工記加分抑或減分呢？
郭偉強鄧家彪直選勢危
愈嚟愈少後生仔唔願意加入政黨，係各黨普遍欠缺新血嘅原因。不過，工記唔夠新人上位，或多或少同自己制訂嘅規條有關。例如工記內部規定，勞工界功能界別議席只可做一屆，完成四年任期就要換人做。如果想繼續做立法會議員，就要挑戰直選。但睇番工記咁多年嚟參加直選嘅戰績麻麻，除咗王國興成功勝出之外，其餘好似葉偉明、潘佩璆都未能打破失敗嘅宿命。
現任兩名勞工界議員郭偉強同鄧家彪，形勢一樣危危乎。郭偉強面臨來屆選舉港島區減一席嘅現實，選情雪上加霜。至於想轉戰新界東嘅鄧家彪，喺建制派爭崩頭嘅情況下加入混戰，相信贏面都唔大。
吳秋北受規限未能出戰
咁不如引進新人？近排言論好惹火嘅理事長吳秋北原本都夠人氣去參選，但工記規定理事長一做就要做足九年，吳秋北啱啱做第二屆理事長，如果呢個規定唔改，即意味住佢將同下年嘅立法會選舉擦身而過。
雖然工記號稱四十歲或以下嘅會員佔過半數，聽落好似唔愁無新血，但依家新一代多數唔願意全職服務工會，亦唔夠瞓身參與，尤其係專業人士。就以剛過去嘅五一大遊行為例，絕大多數參與遊行嘅人都係比較基層嘅一群，好多仲帶埋老婆仔女行出嚟，但係就好少專業人士露面。長此下去，相信工記唔單止選舉頭痕，連工會運作都可能有問題。