中環出更：踩車反「袋」騷 泛民散收收
泛民一連八星期嘅「反袋住先」活動進入第四周。尋日朝早十一點，一班泛民議員諗住踩單車沿途派單張，喺樂富起步時共有七名議員，但係一影完相、做完騷，啲人就陸續喺中途離隊閃人，最終只得新同盟范國威同今次搞手民主黨（白鴿黨）胡志偉堅持到最後，真係有頭威無尾陣。
七議員起步 僅兩人完成
泛民一行約廿幾人，出發前先用單車衝過印有「八三一」框架嘅橫額，然後喺胡志偉帶領下上路，點知街工梁耀忠一影完相就放低架車，踩都無踩過。更加搞笑嘅係，成班踩單車嘅議員慢吞吞，完全追唔上胡志偉，後來竟然用大聲公召回胡志偉。車隊原本要經過四個街站，但係公民黨梁家傑同工黨李卓人做樣踩幾步就「跳車」，結果去到終點得番兩人。
其實，泛民選擇同道路有關嘅宣傳活動都幾冒險。事關早兩星期前，李卓人將身體伸出行駛緊嘅私家車外嗌咪宣傳，違反道路安全守則。泛民今次仍然選擇喺公路踩單車，唔通見過鬼都唔怕黑？
卓妮