政情：陸志聰勸洋漢如廁後洗手
去完廁所要洗手是常識吧？但醫院管理局港島西醫院聯網總監陸志聰，尋日出席一個宣傳潔手活動時就好感觸話，前日去尖沙咀一間五星級酒店出席晚會時，如廁後竟然遇到一名外籍男士去完廁所唔洗手。佢話自己已經「厚多士」咁叫位男士洗手，但人哋騷都唔騷吓佢就咁推門走咗，結果要勞煩清潔阿叔抹乾淨個門柄，陸醫生先敢推門離開。如果清潔阿叔唔喺度，佢咪唔使走？
用生日歌哄小朋友洗手
陸醫生仲講到，香港有兩、三成男士都唔洗手，估唔到連喺高級酒店都遇到，雖然佢曾經「自欺欺人」咁希望嗰位男士有帶潔手液喺身，但機會都好渺茫。
佢又感慨話，到依家先發覺原來咁基本嘅野，真係唔係個個做得到，所以要由小朋友開始教育。佢又分享當年點教小朋友洗手，就係邊洗手、邊唱生日歌，仲話唱完都成十五秒。咁大人又點搞呢？陸醫生建議，出動多種顏色嘅搓手液吸引人去用喎。