最近有人擔心，連續搞咗十二年嘅七一遊行，今年隨時會斷纜，就算搞得成，都唔知會有幾多團體同市民參加。點解搞成咁？皆因經過佔領行動及退聯風波後，負責籌辦每年七一遊行嘅民間人權陣線，影響力同凝聚力已大不如前。加上政改方案係咪通過到、屆時會否出現大規模嘅再佔領，全部都要等到六月中至月底先知道，令到今年七一遊行到依家都未定到主題。
早喺佔領行動之前，民陣已經被更激進嘅本土派及勇武派後生仔狠批評為「左膠」，即係得把口但欠缺具體抗爭行動，每年七一遊行籌完錢、唱完歌就散band，搞咗十二年都爭取唔到乜嘢成果。
有民陣中人預計，今年嘅七一遊行即使搞得成，本土派及勇武派一係玩杯葛唔參與、一係就另起爐灶搞對抗，再唔係就玩踩場同騎劫，三種做法都會令民陣遊行嘅參與人數大減。
最重要嘅係，特首普選方案最終會通過定否決，至今都冇人敢寫包單。若然方案一如所料，喺泛民背叛民意下被否決，又會有幾多市民會再響應民陣七一遊行呢？若果方案爆冷通過，啲反對袋住先嘅團體同市民，可能已經佔領緊立法會同政府總部，仲有冇需要搞七一遊行呢？民陣過往一般喺四月就會公布該年七一遊行主題，但今年就等到依家都未見影，背後梗係有原因。