政情：泛民守株待民主

今年一月狄志遠喺電台節目中公開呼籲泛民要正視民意，對政改方案袋住先，白鴿黨隨即喺社交網站發表聲明，話對狄志遠嘅言論深感遺憾，又話狄志遠嘅言論同睇法並唔代表白鴿黨，老鴿李永達更狂插狄志遠，質疑佢係咪想做官。日前黃成智亦都因為以個人名義發起支持有條件「袋住先」聯署而被凍結黨籍，但該黨內嘅「叛變」似乎仍未因黨內激進派連番打壓而平息。

籲尋第三條出路

羅致光尋日喺電台節目中話，香港近年政治生態不斷變壞，爭論不休，政治問題已經明顯影響經濟同民生，如果一七年政制仲係停滯不前，香港前景只會更令人擔心。佢又話，要有一個中央零風險、泛民都接受嘅方案基本上今日係唔會有，但如果今日原地踏步，將來就會更加渺茫，認為世界會變，中國同香港都會變，大家唔能夠「守株待民主」，仲再次呼籲白鴿黨喺否決同贊成政改方案之間，搵出第三條出路、一個清楚大多數港人都會接受嘅方案。

白鴿黨多次封殺黨內撐政改「袋住先」嘅聲音，羅致光就話，喺呢個水火不濟、鬥得「有你冇我」嘅年代，自己呢個做法只會自討苦吃，兩面不討好，佢並唔介意受到黨內部分人嘅批評，甚至惡意人身攻擊，亦知道自己所謂拋磚引玉提出嘅意見只係「拿着磚頭砍自己嘅腳」；似乎羅致光已為再次呼籲「袋住先」可能被黨內打壓做定心理準備。話時話，泛民到呢刻仍然咁堅持反對政改，莫非佢哋嘅理想係守住棵樹？