中環出更：長毛寸何柱國 「窮到剩係有錢」
社民連立法會議員「長毛」梁國雄、人民力量成員譚香文及「快必」譚得志等數十名示威者，喺本月十五日趁政務司司長林鄭月娥出席「星島第三十屆全港校際辯論比賽」時踩場示威。星島集團轄下嘅《星島日報》同《英文虎報》，近日向上述三人發出律師信索償。長毛回應話，唔明白呢單嘢有乜好訴訟，批評星島集團主席兼全國政協常委何柱國唔講理，「窮到剩係有錢」。
當日數十名示威者分散坐喺比賽會場內，等到林鄭月娥入場後就喺座位上高舉黃傘同示威牌，又不斷高叫口號，部分人仲用埋揚聲器添。最奇怪嘅係，當時在場嘅星島高層同人員未有即時採取任何行動，直至其後譚香文離開座位，走到林鄭身後近距離抗議，並一度用示威牌遮住林鄭塊面時，在場保安人員先出手保護林鄭，但始終未有趕走上述示威者。
梁踩場示威 星島索償
點知星島日前突然透過旗下報章宣布，佢哋已經就事件報警。星島之後更向長毛等三人發出律師信，要求佢哋就事件作出賠償，以及承諾唔會再喺星島日後舉辦嘅活動上示威。
被人告慣嘅長毛尋日就喺立法會反駁，擾亂秩序不一定會造成損失，又強調好多人都針對過林鄭踩場示威，佢唔係第一人，睇唔到星島有乜理據向佢索償，仲譏諷何柱國「講到道理又唔識講，窮到剩係有錢」，只識用錢請律師發信對付示威者，搞到香港好似變咗新加坡咁。佢認為如果何柱國驚有人踩場示威，一早就唔應該請林鄭等高官到場主禮「擦鞋」喎。
卓妮