日前有輛吊臂車駛經油麻地時，橫掃三個懸掛外牆嘅招牌，其中一個大型招牌被撞塌，壓毀路邊一輛私家車，另一輛客貨車亦被碎片濺中，好彩當時冇途人經過咋。今次事件再次證明，廣告招牌亂象叢生，真係防不勝防。
咪以為淨係半空嘅招牌危險，地面嘅招牌一樣危機四伏o架。今時今日廣告牌同廣告燈箱擺到通街都係，梗有一個喺左近，阻礙行人之餘，部分廣告燈箱仲駁埋電線拖出街，隨時引發火警，你話唔驚就假。
最蠱惑嘅係，呢啲廣告燈箱無奇不有，唔少將宣傳海報鑲喺「離地」鐵架，甚至「加轆」，搞到執法部門束手無策。原來根據法例，任何物品佔用官地，例如店舖僭建地台及電梯等，地政總署可以要求拆除，食環署亦可以檢控阻礙清潔工作嘅物主，但可以移動嘅物件就唔包括在內，即係話，只要廣告燈箱「郁一郁」就唔算阻街，咁嘅法例好明顯有漏洞喇。
本報記者去油尖旺區睇過，淨係砵蘭街同上海街一帶嘅行人路，就有最少三十幾個廣告牌或廣告燈箱，其中三分之二已經加轆，執法人員根本無計可施。附近居民擔心廣告牌愈來愈多，好似無王管咁，遲早爆大鑊。嗱，唔係杞人憂天o架，正如有區議員話齋，早年廣告宣傳品多數放喺唐樓樓梯口，或者吊喺樓梯外，依家直接放到行人路上，而且加埋轆，簡直係七國咁亂，過去一個月就收到近十宗有關投訴。立法會議員亦認為，當局有必要修訂法例堵塞漏洞，而喺修例之前，各部門應該採取聯合行動，以免再互相卸責。
其實，廣告燈箱阻街問題已經唔係一朝一夕嘅事，當局早就話要研究提高執法效果，而申訴專員公署舊年亦建議地政總署加強執法及增加法例阻嚇力，可惜全部得個講字，咁多年來問題冇改善不特止，仲愈來愈惡化添。講來講去，都係官僚卸責埋下嘅禍根，處理廣告燈箱阻街，涉及多個執法部門，你推我讓之下，又點可能解決問題吖。
除咗廣告燈箱，易拉架阻街亦係老問題，當局話就話加強執法，但有人見招拆招，只要拉低廣告海報，留低個易拉架，執法人員就無可奈何，你話係咪搞笑吖。
所以話，香港愈來愈亂，除咗社會泛政治化等因素之外，港產官僚明哲保身，得過且過，亦係主要原因。唔使講咁多，政府總部前面嘅帳篷陣愈搭愈多，連木屋都有埋，當局居然視而不見，見而不理，廣告燈箱阻街又算得係乜吖，旨意港產官僚執法喎，蚊都瞓蛇都死喇！