政情：密晤泛民 吳若蘭豈止食晏
由佔領行動開始，外國勢力就明目張膽干預本地政制發展，好似英美政府都分別對香港政改爭議表達關注。尋日有報道話，英國駐港總領事吳若蘭早幾日約咗六個泛民立法會議員食飯，順便了解佢哋對政改嘅立場。獲邀嘅公民黨立法會議員湯家驊承認，喺政改方案臨近表決之際，吳若蘭對泛民議員會唔會轉軚支持好關注，約見嘅次數亦比以往頻密，不過對於午餐會講啲咩內容，佢就話唔講喎！
單仲偕話傾英大選
有份出席嘅仲有白鴿黨單仲偕、何俊仁、工黨張超雄、民協馮檢基同會計界梁繼昌。單仲偕話，吳若蘭成日都會約見立法會議員，唔覺得最近見得特別頻密，亦唔信主題係同政改有關，估計係「睇邊個得閒」。佢話席間大家好少傾政改，反而講英國大選結果多。
親建制嘅保守黨喺英國大選中大勝，唔通吳若蘭想暗示泛民，若否決政改，佢哋喺嚟緊嘅選舉會冇運行？