政情：泛民厚顏「無齒」 開會頻甩底
立法會上月恢復二讀辯論財政預算案，當時社民連及人民力量發起拉布，並提出近四千項修正案。為免因法定人數不足而流會，建制派同泛民之間達成協議，講好每次開會都會派人當值。最近立法會就六百幾項修正案進行表決，尋日因為議事廳內經常唔夠三十五人嘅法定人數，主席曾鈺成差唔多每隔一個鐘就響鐘點人數，拖慢晒表決程序。建制派好勞氣，猛鬧泛民冇遵守承諾。不過，泛民一於好少理，當日有份促成協調機制嘅「飯盒會」召集人梁家傑（袋巾傑）更係「今日的我打倒昨日的我」，話機制純屬知會性質，唔認係協調喎。
會議三小時 響鐘近十次
立法會前日下午開始將六百一十八項修訂案逐一表決，原本預計十七個鐘左右完成表決，並喺下星期三或四可以三讀通過。尋日立法會繼續表決餘下嘅三百九十幾項修正案，會議一開始，人民力量陳志全就要求點人數，嘥咗八分鐘先齊人。之後雖然冇人再借點人數拖延時間，但曾鈺成就要不停響鐘點人數，原因係議事廳內經常差兩至三人先可以表決，會議開始僅僅三個鐘，就已經響鐘近十次。
曾鈺成話，根據過往經驗，喺議員配合嘅情況下，一小時可以表決三十四至三十五項修正案。不過，尋日一個鐘只能夠表決二十項修正案，由於仲有三百幾項未表決，預計表決程序需要花超過十八個半鐘，可能無法喺今午一時前完成所有修正案表決，令三讀表決亦要順延。佢批評有啲人連趕返去議事廳投票都費事，促請議員顧及公眾形象。
僅五至六泛民喺議事廳內
民建聯主席李慧琼批評話，該黨議員都「坐定定」，相反泛民只有五至六人喺議事廳內，認為佢哋需要為現況負責，仲話議員有責任令會議順利進行，拉布嘅議員浪費時間。李慧琼黨友葉國謙就話，已經向袋巾傑表達不滿，要求他們遵守早前協調嘅機制。尋日朝早都缺席嘅民主黨主席劉慧卿話，佢一早約咗一名德國記者會面，所以無出席會議，但就唔評論個別黨派嘅議員喎！