美國經濟學家奧爾森有一本名著《集體行動的邏輯》，其中心思想用大白話來說就是「三個和尚沒水喝」；學者劉瑜說，當一件事情受益者人數愈多，由於「搭便車」心理，人們主動去做這件事的動力就愈弱。正正如此，香港有不少決策衰咗，一扯到「問責」，最叻就係話「集體負責」，到頭來個波踢來踢去──終於就係冇人要負責，是以問責官員衰極都係唔使下台嘅！
之不過，有時「三個和尚沒水喝」也未嘗不是好事，大家推吓推吓，可能唔成事就當乜事都冇發生過。好衰唔衰，出了個「貪曾」前特首曾蔭權爵士一味好大喜功，大言炎炎要搞「十大基建」，搞到幾乎全部變成無底深潭！
呢呢呢，貪曾學咗大猩猩拍晒心口興建嘅廣深港高鐵地段，最近屢傳造價超支，另一燙手山芋係高鐵「一地兩檢」問題懸而未決。
立法會交通事務委員會主席形容，高鐵工程不單係「洗濕咗個頭」，直情係「全身濕晒」！冇錯，如今工程搞到唔湯唔水，若然叫停，日後或要面對承建商巨額索償，繼續硬着頭皮建下去，又唔知超支幾多及如何解決「一地兩檢」問題，是進亦憂退亦憂，貪曾真係佗衰家，留下的政治炸彈拆不完！
所以話匹夫之勇有可能累事，而「集體行動」有可能避過一劫。一本通書不能睇到老，是以「老」字訣，老問題，老不解決，沒甚麼大不了！至於「拖」字訣，拖事情，久拖自「磨」平，一樣解決了！還有「賴」字訣，平庸無能，只會鑽營，尸位素餐，賴死唔走，一樣好官我自為之，好似周一鑊之流，也沒甚麼問題！反而貪曾一味要認威，經常狂言亂語，甚麼單靠金融業就可養活一千萬人！而查實佢禍港七年只為自己一人謀幸福！施政只知十大基建而不知要多建公屋！