政情：鄉紳牌匾贈發叔 易惹誤會
鄉議局將會喺六月換屆，大家都好關心擔任主席卅幾年嘅劉皇發（發叔）會唔會再選。一班鄉紳上月聯署要求發叔連任主席，發叔尋日就喺鄉議局執委會上多謝大家嘅心意，話會慎重積極考慮喎。
不過，佢話自己最近健康唔理想，中氣不足，唔想講咁多，希望大家明白佢嘅心意。其實發叔近年經常放風話要交棒，但每次都係「引蛇出洞」後順利連任，睇嚟真係班鄉紳先明白佢嘅心意。
換屆前夕送「功高譽隆」
除咗聯署外，鄉議局成班委員連同二十七個鄉事委員會尋日仲送咗一塊「功高譽隆」牌匾畀發叔，多謝佢對於協助訂立《基本法》第四十條，維護新界人傳統權益嘅貢獻。但換屆敏感時刻送塊咁嘅牌匾，好易令人誤以為發叔唔再連任。