政情：黃成智否認收錢撐「袋」
自從一二年立法會選舉落敗後，民主黨老鴿黃成智開始低調，但近日就因為政改「袋住先」立場同個黨反晒面，仲甘冒開除黨籍嘅風險，尋日高調開記者會發動「一人一信」有條件撐政改行動。黃成智忽然咁主動蒲頭，政圈一直傳佢「收人錢做嘢」，但佢就否認收錢，自爆經濟情況良好，皆因近年賣咗天水圍層樓，轉住旺角一個三百幾呎嘅單位，扣埋個仔喺美國讀書嗰筆錢，仲有唔少錢剩，而今次行動預計使五萬元，都係自掏腰包。
黃成智仲喺記者會上「開價」，話只要中央願意將提名委員會嘅選民基礎，由公司票改為個人票，以及設立白票守尾門制度，佢就會游說白鴿黨議員「袋住先」。
謀重選區會
除咗「收人錢做嘢」嘅傳聞外，外界一直猜測黃成智係咪想重返政壇，尋日佢都承認會考慮捲土重來參加年底區議會選舉，至於明年立法會選舉，佢亦冇閂死後門，只係話目前未有諗法。呢隻老鴿到底飛唔飛得起，相信好快就揭盅。