政情：消防處長被爆鬼祟訪京
政府部門首長訪京經常都有，但好似消防處處長黎文軒訪京訪得咁鬼祟就第一次見。話說尋日有香港傳媒見到黎文軒帶住成棚人喺北京國務院港澳辦公室出現，於是問佢係咪見主任王光亞囉，點知佢只係笑笑口，揮揮手，十問九唔應就走咗，冇嚟大方，咁鬼祟做乜呢？
急發新聞稿補鑊
其實黎文軒今次率領十人訪京，事前係冇通知傳媒嘅，直到傳媒打電話問到消防處新聞組，先至補鑊出稿，話黎文軒係喺本周日率團到北京，進行為期四日嘅官式訪問，期間見過公安部、公安部消防局、交通運輸部救助打撈局等人員，又順道禮節性拜訪港澳辦。從港澳辦發出嘅官方照片，黎尋日獲副主任王志民接見。
講開又講，其實自從「貪湯」前廉政專員湯顯明被揭發奢華外訪後，各部門首長都好識做，盡量帶少啲人外訪，奉行節約原則，黎文軒今次帶成十人外訪，淨係機票酒店都幾襟計，睇怕立法會議員係時候要了解吓發生咩事嘞。