政情：陳弘毅獻計 變相踢走泛民
立法會即將審議政改方案，泛民主派仍然堅持否決方案，寸步不讓。基本法委員會委員陳弘毅日前就獻計，建議政府撤回政改方案，讓市民透過明年立法會選舉表達民意，再交由新一屆立法會議員表決政改方案，有望夠票通過，言下之意即係等全港五百萬選民踢走泛民議員。不過，陳弘毅尋日向民主黨立法會議員劉慧卿硬銷，卿姐聽到都話嚇一跳。
陳弘毅早前提出政府可以先撤回政改方案，直至明年立法會選舉後，如果屆時有三分之二議員支持方案先再提出，咁樣就可以繼續喺一七年落實普選特首喇。雖然政府同建制派都反應冷淡，但陳弘毅仍然未氣餒，尋日出席卿姐網台節目時繼續推銷。佢話，雖然坊間好多民調，但並非每位市民均有機會受訪，民間收集簽名行動亦唔夠嚴謹，而香港又唔能夠進行公投，所以最好就係透過立法會選舉用選票發聲。
陳弘毅仲話，雖然泛民喺一二年立法會選舉取得約五成半支持，但當時仲未有人大「八三一」決定及政改方案，所以唔知道當時投票畀泛民嘅選民依家係咪仲支持泛民，佢哋嘅意見係「無門表達」，而選票就係最有效方法。
普選可延至一七年六月
對於卿姐質疑時間上好緊迫，佢就解釋，特首選舉唔一定要喺一七年三月舉行，而提名委員會組成至選出特首大約需要五、六個月時間，如果明年九月新一屆立法會產後通過方案，再用兩、三個月進行本地立法程序，仍可趕及一七年六月普選特首，新一任特首就可以如期在七月一日上任。
現時民意普遍支持通過
卿姐話開頭以為陳係想爭取多嘅時間畀政府改善方案，但原來係想反對派喺立會選舉輸晒，等政改方案可以通過。據聞建制派對於陳嘅建議都覺得未嘗不可，因現時民意普遍支持通過政改，利用政改踢走泛民都可以話諗得過，只係政府反應冷淡，建制派亦唔敢盲撐。
新界社團聯會尋日亦公布本月初委託香港研究協會進行嘅政改意見調查，四成八受訪者認為如果未能通過政改，泛民要負上最大責任。泛民係咪繼續要做建制派口中嘅千古罪人，就要佢哋自己抉擇喇。