政情：財爺一句美食車 議員嗌外訪
財政司司長曾俊華（鬍鬚曾）喺今年財政預算案提出引入歐美流行嘅美食車，以振興本港旅遊業。雖然計劃十畫都未有一撇，但立法會食物安全及環境衞生事務委員會就已經密謀去美國考察，話要睇吓當地嘅美食車點經營，呢個建議仲係由委員會主席、飲食界張宇人（Tommy）提出。不過，委員會成員似乎對考察反應冷淡，甚至批評Tommy為咗鬍鬚曾一句說話就山長水遠去美國，簡直係浪費公帑喎。
同僚反應冷淡
食物安全及環境衞生事務委員會近日討論今年九月到美國紐約及三藩市進行職務訪問，了解當地美食車嘅經營模式同埋外國對進口食品嘅規管，預計訪問為期七日。呢個建議正正係由Tommy早前喺會議上提出，佢仲自爆曾經有公司喺三藩市經營美食車，對當地情況相當了解，又建議去埋紐約，因為當地街道狹窄，似香港情況，加上美國唔同州有唔同法例，所以可以參考晒兩地嘅做法。秘書處於是對Tommy嘅建議諮詢委員會成員意見。
不過，泛民主派議員陳家洛就表明冇打算參加今次考察，仲話政府依家對美食車計劃都冇實質建議，到真係有建議書出嚟先考慮係咪需要去考察都唔遲。況且莫講話Tommy已經有當地經營美食車嘅經驗，立法會秘書處亦都有研究部門可以進行相關研究，所以陳家洛就質疑為咗鬍鬚曾嘅一句說話就貿貿然去一轉美國，係嘥晒啲公帑。
「美式」未必啱使
除咗陳家洛大潑冷水外，其他議員都對美國之旅不太感興趣，今年咁啱係區議會選舉年，唔少議員都話不如把握暑假呢個黃金檔期落區拉票好過。唔使為區選惆悵嘅漁農界議員何俊賢，亦都話對於去美國考察嘅意欲唔高，覺得美國啲美食車咁大架，未必適合香港環境，不如參考台灣嗰啲，近近哋之餘仲可以睇埋當地嘅農業發展喎。似乎Tommy嘅建議並唔係好受議員支持，唔知佢去美國嘅願望會唔會落空呢？