港府口口聲聲視房屋問題為施政重中之重，可惜喺現實當中，拓土建屋寸步難行，所謂重中之重，純粹得個噏字嘅咋。呢，有人提出司法覆核，要求推翻房委會嘅公屋計分制，一旦挑戰成功，當局都咪話唔頭痕。
眾所周知，公屋輪候冊大排長龍，已突破二十八萬大關，當中唔少係非長者單身人士。由於僧多粥少，為咗加快家庭及長者申請人士上樓時間，房委會喺○五年引入配額及計分制，將年輕人剔出平均三年上樓嘅目標之外，令佢哋上樓更加遙遙無期。好似嗰位提出司法覆核嘅市民咁吖，因為當局政策改變，輪候咗九年半嘅佢仲可能要再等多十九年，問你服未。
講到底，有頭髮冇人想做瘌痢，愈來愈多非長者單身人士申請公屋，都係迫不得已咋。今時今日樓價高不可攀，租金水漲船高，有幾多年輕人買得起租得起私樓呢？佢哋唔申請公屋又有咩選擇呢？家陣劏房遍地開花，連豬欄、雞欄都有價有市，連天橋底都爭崩頭，咪就係房屋問題嚴峻嘅真實反映囉。公屋計分制等於將年輕人拒諸門外，佢哋望樓興嘆，唔徬徨至奇吖。
即係咁，公屋作為有限嘅社會福利資源，當局訂出上樓優先次序，畀最有需要嘅人士優先上樓，係無可厚非嘅。再講吖，年輕人有氣有力，機會點都比中年及老年人多，尤其大學生一畢業就申請公屋，始終有啲講唔通。如果今次司法覆核挑戰成功，公屋輪候時間隨時比現時平均三點三年增加一倍，輪候冊肯定更加逼爆，到時都唔知點收科。
當然喇，當局唔係唔知房屋問題嘅嚴重性，亦唔係唔想解決問題，而係黔驢技窮，束手無策。喺土地及房屋供應冇辦法增加嘅情況下，唔係見縫插針，就係挖東牆補西牆，根本無補於事。長策會係就係訂出未來十年建屋四十八萬個單位嘅目標，但學古人話齋，先生之志大矣，先生能力不足，連房委會都承認新建成公屋單位數目未能達標，十年房策只能紙上談兵咋。
冇計嘞，前特首貪曾爵士無所作為，搞到房屋問題積重難返，加上今時今日社會泛政治化，當局覓地建屋舉步維艱，連東北發展計劃都阻力重重，巧婦難為無米之炊。最好笑嘅係，政客一方面要求港府加快建屋，一方面諸多設限，神又係佢哋，鬼又係佢哋，房屋問題有乜辦法唔惡化吖！