政情：公民講場：張華峰火滾批泛民播獨

為咗唔助長立法會議員梁國雄（長毛）等人就財政預算案撥款「拉布」，建制派已有共識封嘴，如非必要都唔會就預算案發言。不過，尋日大會就經濟發展、工商及財經事務範疇開支總目進行辯論，金融服務界議員張華峰就焗住發言，講到近期針對內地遊客事件時仲好火滾，批評泛民主派放棄內地遊客市場係荒天下之大謬，又質疑泛民只要求削減向內地遊客宣傳嘅開支，並非擔心本港承載力，而係仇視內地、宣傳港獨。長毛就反駁，本港唔應該只着重內地遊客，本土旅遊都係旅遊業一部分，仲反問「我搭車去西貢食海鮮唔係旅遊業咩？」