居民怨港鐵 封路反轉慈雲山

「平時喺巴士總站落車就可以直接過對面馬路返屋企，依家幾條路都封死晒，真係好唔方便！」慈雲山居民張小姐表示，雲華街與毓華街部分行人路及行車線近日因港鐵工程被封，由於圍封範圍甚廣，對附近居民造成極大不便。張以慈樂邨為例，過往邨民如從慈雲山中心巴士總站下車，只需經惠華街到雲華街過路處即可踏上歸家之路，如今卻需「兜個圈再上橋」，全程要花上近十分鐘，不少邨民為貪方便未有取道天橋，而選擇走出馬路，令車輛閃避行人的驚險場面不時出現。

路線迂迴 夜歸安全堪憂

本身居於慈愛苑的張小姐則因工作關係需夜歸，自附近道路被封後，每晚需以較迂迴路線回家，坦言擔心安全，「我搭車要喺毓華街落車，以前就算商場太夜閂咗門唔可以經商場上天橋，都仲可以行上雲華街返屋企，但依家條路封咗，一定要行入慈樂邨、再經雙鳳街，再上天橋又過馬路先返到去，你都咪話唔驚！」

有市民邊使用電話邊「攝車罅」沿馬路進入商場，大型車輛則擦身而過。	有市民欲跨過圍欄往返附近屋苑。	港鐵派出安全大使（箭嘴示）在現場提醒居民改道事宜。

港鐵發言人表示，為配合沙中線工程，毓華街與雲華街部分行人路及行車路已實施臨時交通管制措施，以進行行人設施改善工程，預料分別於今年底及明年第二季重開，強調已設置充足指示牌及增派安全大使，封路前亦已諮詢社區聯絡小組及區議員意見。

區議員促加快工程進度

「港鐵的確係有同我哋溝通，但問題係當我哋講出居民有咩不滿時，佢哋都一味只係話啲機器已經擺咗喺度，所以冇得改，咁其實講咩都冇用！」當區區議員袁國強證實曾接獲不少街坊投訴，港鐵卻以已於路段放置機器為由，拒絕縮細圍封範圍。袁國強認同因工程而需封路屬無可避免，但認為港鐵應加快工程進度，將影響減到最低。

立法會交通事務委員會委員范國威亦要求港鐵密切監察工程進度，同時加強宣傳，勸喻居民安全往返目的地，「港鐵同政府應該用居民角度諗，改咩路行最方便同最快，再教佢哋點行，等市民知改行天橋時間都唔會差好遠，唔係話做工程封晒成條路就算，又可以安全啲！」

記者：陳瑋珩、黃凱翎