廉政專員白韞六日前出席活動，被問及一些牽涉高官嘅案件已調查了一段長時間，質疑廉署是否刻意拖延。所講嘅「刻意拖延」，係人都知指嘅係「貪遍省港澳，歎盡海陸空」嘅前特首曾蔭權爵士。
公眾之所以疑惑廉署係「刻意拖延」，皆因前刑事檢控專員薛偉成早在一三年八月離任前已表明，曾蔭權案調查近尾聲，市民以為貪曾好快會被落案檢控，點知等到花開又花謝，依然未見「人下來」，自然對廉署大失所望，而香港嘅廉潔指數亦一再下挫。傳媒問白韞六，佢又一味封嘴，頂多官腔話香港仍是廉潔地方，又指高官貪污屬個別個案。
老朽心想，白韞六姓白，再問落去都係阿媽係女人，都係「白問」；咁啱又睇到有自稱「天朝詩人‧白交易」嘅網民，寫了首「憫股民」嘅打油詩，幾妙趣：鋤禾日當午，炒股好辛苦。對着Ｋ線圖，一哭一上午。哭了一上午，還要哭下午。倉位補不補，心裏好痛苦。補了也白補，不補更痛苦。為何會這樣，只有問政府！然而，問政府──許多時候也只落得「白交易」，正當老朽以為貪曾一案，問白韞六亦都係「白問」之際，誰知一上東網，竟然又有獨家猛料，話說澳門有神秘富豪去廉署助查，提供了多項貪曾在澳門活動嘅資料；消息指，廉署三個多月前已提交拘捕貪曾嘅有力調查報告，只要律政司拍板，廉署便會立即採取拘捕行動，將禍港多年嘅貪曾繩之以法！
若然，咁就真係一天光晒，「法律的職責在於確保正義的落實」，生活中嘅美好事物──好似「廉潔奉公」、「香港勝在有你同ＩＣＡＣ」是否永存不移，就真係要睇律政司呢台戲矣！老朽深信，貪曾落鑊之時，必是香港廉潔指數蓄勢待升之日也。出得嚟行，遲早要還，有至理。