民主黨（白鴿黨）「超級區議員」何俊仁（AV仁）今年初宣布將會喺立法會否決政改之後發動辭職變相公投，雖然呢個建議喺黨內有唔少反對聲音，但AV仁仍然信誓旦旦話點都會搞落去。不過，政治真係一日都嫌長，政客講嘢無句真，事隔四個月，尋日佢終於喺電台上承認，辭職公投最終成事機會比之前低好多。聽聞AV仁明日會正式宣布辭職公投壽終正寢。
當日AV仁自把自為宣布搞辭職變相公投，引起唔少爭議。不過，當時學民思潮同學聯力撐公投，泛民都覺得有學界支持下，公投有機會搞得成，所以都冇提出反對，任由佔領行動衍生出來嘅「五方平台」處理。點知「雙學」最近相繼反口，學民突然抽身話唔參與，只係畀「掟煲費」了事；而學聯就因為各大學退聯一事「火燒後欄」，無暇兼顧。
其實泛民議員近日都私下討論公投可行性，但大部分人都覺得雙學退出，令公投失去學界支持，大大減低公投嘅認受性。既然大家都意興闌珊，泛民亦無意玩落去，聽聞AV仁都決定喺明日宣布擱置辭職公投。
其實大家都估到學民反口，但估唔到AV仁竟然咁天真相信學民仔會同你講金又講心，今次錯信學生真係攞嚟衰！