中環出更：元朗兩委任區議員 直選對撼
區議會委任制過埋今年就成為歷史，所以唔少委任區議員都搵定位轉戰直選，其中元朗區議會戰況特別激烈。兩名元朗委任區議員王威信及莊健成，竟然狹路相逢，都喺新元朗中心呢個新選區內插旗，除落重本開設地舖辦事處外，同時聘請兩至三名助理，兩個辦事處只相隔一條街，睇嚟呢場建制派大戰應該幾有睇頭。
建制內訌 王威信VS莊健成
其實兩人都緊貼民生議題，區內大小事務都好關注，如果要突圍而出，就要有個人特色至得。身兼足總董事及天行元朗球隊主席嘅王威信，就希望利用足球融入社區，除咗搞足球興趣班，仲搞埋親子睇波團，等小朋友上完堂就即刻同父母入場睇波，既親子又可振興本地球圈，一舉兩得。
至於莊健成就話自己出身商界，明白市民最緊要搵到食，所以近期都搞投資理財策略講座，等街坊可以喺呢個大牛市投資有道。據聞呢區暫時未有泛民主派加入戰團，如果有就真係七國咁亂嘞。
卓妮