中環出更：甄韋喬勉後輩「誰都可當傑青」
每年一度嘅十大傑出青年選舉已接受提名，唔少歷屆傑青都趁日前國際青年商會香港總會（JCI）六十五周年晚會，分享過去嘅工作。有「清潔王子」外號嘅傑出青年協會主席甄韋喬（Mickey）話，唔經唔覺已經選咗三百九十二名傑青，當中咩人都有，部分更係更生人士，證明無論咩背景，只要發憤向上都可以成為傑青。
Mickey話，下月會考察監獄，希望讓會員了解吓監獄嘅環境，佢仲透露計劃製作傑青特輯，希望可以激勵在囚人士。講開呢個話題，Mickey就話依家少咗請更新人士，原因係佢哋多咗好多選擇，而且工作待遇亦比以前好，但作為僱主，請人就難咗好多。
李秀恒彈呢代人卸責政府
Mickey讚揚唔少更生人士都好勤力，其中懲教處嘅更新計劃更加係功不可沒。
中華廠商聯合會會長李秀恒（Eddy）早喺九一年就當選十大傑青，現時擔任JCI嘅顧問。講到二十幾年前嘅傑青有咩分別，Eddy覺得依家嘅傑青認受性差咗，以前好多得獎者都係捱出頭來，但依家嘅後生仔就唔認同呢個觀念，覺得捱係自己攞嚟。上一代人會講讀唔成書、甚至買唔到樓係自己嘅責任，反觀今日好多人就將呢啲問題推畀政府。
和富社會企業會長李宗德擔任咗JCI嘅顧問差唔多六年，佢話平時經常接觸年輕人，有時聽到佢哋嘅意見都好開心。不過，唔知係咪因為科技進步，網上社交媒體發達，令到年輕人對文化價值嘅睇法改變咗。
卓妮