香港人以前出名「食得招積」，家陣就追求「食得有營」，梗係啦，生命冇Take Two，健康最緊要吖嘛。之不過咁，如果「有營食肆」貨不對辦，「三低之選」變咗「三高之選」，咁就分分鐘食出病來。
係咁嘅，衞生署為咗提倡健康飲食，多年前推出「有營食肆」計劃，規定參加嘅食肆恒常提供低糖、低鹽、低油及多菜嘅菜式，署方會發出有營食肆標籤以供識別。成件事出發點咁好，梗係值得支持啦。幾年過去嘞，計劃搞成點呢？講起來就羞家囉，官老爺監管不力，「有營食肆」有頭威無尾陣，甚至「有營」變「冇營」，簡直靠害。
嗱，本報記者巡查十間參與計劃嘅食肆，並將有營菜式嘅醬汁交畀專家化驗，結果係唔驗唔知道，一驗嚇一跳，其中一款醬汁每百克含鹽量竟然高達十克，相等於兩茶匙鹽，足足係世衞建議每日攝取量嘅兩倍，比非有營嘅湯麵含鹽量亦要高出一倍。咁仲唔止，有餐廳提供嘅有營菜式，居然包括含鈉量偏高嘅罐頭茄汁豆，市民愈食愈冇營，唔食出病就奇嘞。
記者巡查仲發現，十間有營食肆之中，多達七間根本冇提供有營菜式，即係掛羊頭賣狗肉喇。其實，全港食肆超過一萬三千間，參加計劃嘅只有六百七十九間，不足百分之五咁大把，足證計劃幾咁失敗。係人都知，心臟病、糖尿病、高血壓等都市常見疾病，同飲食習慣有好大關係，有營食肆名不副實，市民健康仲邊有保障喎。
有營食肆計劃荒腔走板，睇見都眼冤，點解搞成咁？有立法會議員就講得啱嘞，衞生署每年只會於食肆續領資格時作出審核，之後唔會定期跟進，關人個關，食肆過咗海就係神仙，有關計劃流於形式主義，有乜出奇吖。
仲有一樣嘢值得研究，話明係有營食肆，點解要加糖加鹽加足料呢？原來「家家有本難唸的經」，飲食業話喎，好多時候唔係食肆唔想遵守「三低」煮食原則，而係客人挑剔，尤其係中菜，口味稍為清淡啲啫，客人都會投訴，質疑師傅水皮。加上衞生署宣傳不足，好多小食店以為計劃只限大集團參與，影響計劃成效，業界要求署方做多啲宣傳同教育咁話。
一句到尾，千錯萬錯都係官老爺嘅錯。點都好喇，現代人愈來愈追求健康生活，食得有營真係好重要。當局最近成立「降低食物中鹽和糖委員會」，仲話要推行「全城減鹽減糖」添，咁就唔好得個講字嘞，除咗衞生署要做好監管，委員會亦應加快推行步伐，咁先係向市民健康負責吖嘛！