政情：今日你上鏡：5.29免費搭電車小輪

香港總商會為慶祝創會一百五十四周年，本月二十九日免費請市民乘搭全線電車，以及天星小輪往來尖沙咀至中環及灣仔兩條渡輪航線，料將會有三十萬人受惠。總商會主席彭耀佳及總裁袁莎妮（Shirley）尋日孖住出嚟公布今次免費搭車又搭船嘅安排。彭耀佳話，電車及渡輪兩種公共交通工具喺香港最有代表性，而且與總商會歷史同樣悠久，所以商界希望透過呢兩種交通工具回饋市民。請市民搭電車同坐渡輪已經搞咗好多年，被問及明年慶祝會否真係搞吓新意思，Shirley就反叫大家諗到好橋話聲佢知喎！