政情：民主阿婆無所事事
每逢香港有大事或政改重要時刻，人稱「搞事四人幫」嘅成員都會頻頻出動。好似被指為成員之一、外號「民主阿婆」嘅前政務司司長陳方安生，尋日就應承電台喺早上十一點接受訪問講政改，但點知佢突然提早一小時抵達電台，搞到節目主持無奈提早同佢做訪問。唔通民主阿婆起身後無所事事，所以諗住早啲到電台行行企企？
提早一個鐘到電台受訪
雖然提早咗一個鐘到，但佢仍然講埋啲言之無物嘅嘢，例如批評政府唔應該製作咁多政改宣傳短片，又話一日立法會未通過政改方案，政府高官都唔應該以個人身份落區兼簽名撐政改，仲話自己當年為官一定唔會咁做喎。民主阿婆當年梗係唔會咁做啦，佢幾時有為港人爭取過民主同普選吖！
肥佬黎赴台又想攪局？
被指為同屬「搞事四人幫」嘅壹傳媒集團前主席黎智英（肥佬黎），尋日中午時分亦一支公由何文田寓所出發到機場，見佢孭住個背囊，戴住頂帽就過關，聲稱會飛去台灣逗留兩至三日，莫非係去取經，又密謀攪局？