中環出更：兩舊「雲」為拗而拗？
立法會民政事務委員會尋日討論多個區議會嘅一億元社區重點項目，其中油尖旺區議會建議將現時佐敦炮台街休憩處改建為多元文化活動中心，供少數族裔舉辦活動之用，並建議由新家園協會負責營運，點知掀起同屬九龍西選區嘅民建聯蔣麗芸（Ann）同民主黨黃碧雲（一舊雲）一番爭論。
由社區項目講到宗教分歧
就多元文化活動中心項目，新家園協會及循道衞理楊震社會服務中心都有遞交標書。阿Ann話，少數族裔本身有唔同宗教信仰，好似回教、佛教同印度教咁，冇理由交畀一間基督教機構（循道衞理）營運。一舊雲就質疑，如果有宗教背景就唔可以為少數族裔服務，係違反多元共融嘅概念及唔公平，做法形同「玩人」，亦有宗教歧視之嫌。
阿Ann反駁，指一舊雲嘅講法太有偏見，冇話一個宗教唔可以服務另一宗教，但就再次質疑基督教點樣服務回教同印度教，又斥對方「頭腦混沌到不得了」。其實根據政府提供嘅文件，委員會已經揀選咗新家園協會作為夥伴機構，唔知佢哋有冇睇清楚文件，抑或係為拗而拗呢？
卓妮