大坑：「食街」夾道違泊惹不滿

「兩邊都泊滿晒車，好似夾道歡迎你咁，條路明明好闊，都搞到淨係夠一架車行。」周先生指大坑近年食肆林立，吸引不少市民駕車光顧，惟有車主疑貪方便，令銅鑼灣道近皇仁書院一帶常有車輛違泊，影響居民生活，「有時連巴士站都有車泊喺度，搞到走出馬路先上到車。」

警方發言人證實，由去年三月至今年二月，共接獲十一宗有關涉事路段違例停泊投訴，期間共發出十三張定額罰款通知書，今年三月上旬接獲投訴後亦有派員處理，並發出一張定額罰款通知書。

周先生直指情況未見改善，認為解決違例停泊問題，除依靠警方執法外，長遠亦應在區內覓址增闢泊位，「其實呢區逐漸由住宅區變做食街，好多人講起大坑就諗起呢度有好多食肆，故規劃上應該配合番個情況，唔係嘅話違泊只會抄極牌都仲有。」