「酒債尋常行處有，人生七十古來稀。」杜甫詩句充滿樂觀心態，人活到七十歲世上稀有，應該今朝有酒今朝醉。時移勢易，今日人生七十已經唔算稀有，但想學詩人咁灑脫一啲都唔易，尤其喺香港，唔少長者老無所養，晚景淒涼，想樂觀都樂觀唔起。
呢，有位七十三歲長者為咗生活，以假身份證報細十一歲，騙取大廈保安職位，結果被判入獄四個月。雖然佢提出刑期覆核，並獲得資深大狀義助，法庭仍維持原判，仲話已經係非常低嘅刑期喎。唉，年逾古稀自食其力，竟然換來牢獄之災，呢個究竟係乜嘢世界！
即係咁，國有國法，家有家規，行使假身份證屬於刑事罪行，法庭依法判案都無可厚非嘅，最值得大家深思嘅係，呢位長者點解要出此下策呢？七十三歲本來應該安享晚年至係，點解仲要做大廈保安呢？
有頭髮冇人想做瘌痢，如果老人家唔係為生活所逼，根本唔需要報細年齡，更加唔需要行使假身份證。正如有人話齋，香港欠缺社會保障制度，希望自食其力嘅長者冇得選擇，好多時只能望天打卦，甚至鋌而走險。
所以話，講來講去都係港府嘅責任。香港話就話係富裕城市，港府肥到連襪都着唔到，但唔少長者孤苦無依，好似被社會遺棄咁，講起都淒涼。可以見到，有老人家靠執紙皮維生，有老人家打劫博食皇家飯，有老人家八十幾歲仲要揸小巴搵食……呢啲本應第三世界至有嘅情形，居然出現喺香港，唔止係長者嘅悲哀，簡直係港府嘅恥辱。
本來呢，以香港雄厚嘅經濟實力，根本唔應該有咁多長者老無所依，老無所養，弊就弊在港府涼薄縮骨，唔肯承擔。一直以來，港產官僚淨係識得靠嚇，一時話人口老化導致福利開支負擔沉重，一時又話幾年後可能出現結構性財赤，卒之乜都唔肯做，連全民退休保障計劃亦一拖再拖。
敬老尊老係中國社會嘅傳統美德，早喺唐朝時，朝廷就定期向老人家發放糧食、布帛等作為養老金，而且規定地方政府要定期為老人家舉辦酒宴，等所有人都知道敬老嘅禮儀同美德。反而來到今日，港府居然將安老責任當成一個包袱，推得就推，搞到唔少長者臨老唔過得世。其餘唔講，安老宿位長期不足，導致每年都有幾千名老人家喺等候中死亡，擺明就係虐老喇。
最不知所謂嘅係，港府成日話要審慎理財，為下一代着想喎，其實，佢哋連呢一代都唔肯照顧，又何德何能為下一代着想吖！