政情：公民講場：六萬僭建待拆 怎容「許」冇人手

審計報告早前炮轟屋宇署喺清拆僭建物上有拖延，立法會政府帳目委員會尋日就此召開聆訊。帳委會副主席謝偉俊就質疑屋宇署明明四年前獲得十二億元撥款，但處理嘅僭建物數量竟然比十年前仲少。屋宇署署長許少偉就話，政府二○○一年提出十年計劃處理僭建物，但四年前臨時撥款結束，大量非合約公務員離開，搞到佢哋唔夠人，每次有突發事故更要四圍撲抽調人手︰「我都想有人standby（候命），有事即刻衝落去！」有議員見屋宇署人又冇、錢又唔夠使，就將矛頭指向負責嘅發展局局長陳茂波，問佢可唔可以幫吓許少偉咁話。屋宇署依家仲有六萬幾張清拆令未執行，真係巧婦難為無米炊喇。