政情：博鰲青年論壇加碼復辦
原定於去年十一月舉辦嘅「博鰲亞洲青年論壇（香港）」，因為佔領行動而要延期到本月下旬舉行。唔知係咪因為上年冇舉辦到，今年論壇首次由過往一日議程增加至兩日。主辦單位香港菁英會主席梁宏正話，今年活動新增首日嘅「青年觀察家圓桌」及「分論壇」環節；次日則係大型演講及論壇，預計兩日合共約二千人參與。
菁英會常務副主席盧金榮話，今年會有來自唔同地方嘅年輕人及講者一齊出席，包括科技大學校長陳繁昌、阿里巴巴集團副總裁車品覺，仲有來自韓國、以色列等地嘅講者。今年主題集中圍繞科技、經濟及創新文化等，籌備委員會總指揮莊家彬話，智慧化技術帶來唔少發展商機，值得年輕人留意，佢近年就開始同公司研究合作生產「可屈曲電池」，因為智能手錶及電話愈出愈多，電池大小及耗電量亦需跟上科技產品潮流而改變。