去年佔領行動期間，學民思潮同學聯（雙學）兩大學生團體，曾經喺港大民調十大政團評分中排頭幾名。但花無百日紅，最新港大民調十大政團評分中，雙學就因為市民認知率過低而不獲評分，由天堂跌到落地獄，唔通市民咁快睇穿咗雙學真面目？
港大民意研究計劃公布最新十大政治團體評分結果，去年佔領行動期間排名榜首嘅學聯同排行第五嘅學民思潮，都因為認知率過低而不獲評分，變相跌出十大政團排名外。
因為躋身十大政團嘅先決條件，市民認知率必須排喺頭十二位內，但雙學認知率跌至第十三、十四位，自然連評分都冇啦。
學聯近日因為有院校相繼退聯而面臨瓦解，學民思潮亦唔好得去邊。去年佢哋要求民主黨立法會議員何俊仁辭職引發變相公投，到何俊仁答應辭職，學民思潮就話「施捨」廿萬元就算，令唔少人批評學民思潮冇政治道德。