中環出更：座駕神秘出入 肥佬黎疑攪局
壹傳媒集團前主席黎智英（肥佬黎）上月廿一日同家人漏夜離港去歐洲，事隔十多日後，肥佬黎嘅司機再次出動，駕駛肥佬黎平時坐開嘅七人車多次於黎宅、外號「李漢奸」嘅民主黨創黨主席李柱銘位於半山馬己仙峽道寓所、香港國際機場三個地點，神秘來回折返。原本一直唔見影嘅肥佬黎，直至深夜時分先乘坐七人車返回寓所，認真耐人尋味。
尋日下午二時，卓妮見到肥佬黎嘅司機駕駛肥佬黎嘅七人車，接送肥佬黎嘅老婆同其中一個兒子返回位於何文田嘅黎宅；及至下午五時，肥佬黎嘅司機駕駛肥佬黎七人車出動，由黎宅直駛李漢奸位於半山寓所，肥佬黎七人車逗留約十五分鐘離開，而事隔一小時後又折返李漢奸寓所，留咗約十分鐘又再離開。
深夜現身 耐人尋味
最耐人尋味嘅係，期間肥佬黎七人車嘅車窗窗簾全程拉上，肥佬黎本人全程無現身，及至晚上約六時半，反而見到天主教香港教區前主教陳日君喺李漢奸寓所大廈步行離開。
晚上八時，肥佬黎嘅七人車同私家車兩部車首次齊齊出動，其中私家車直接前往機場再返回黎宅，全程空車出入，冇見接載任何人，直至深夜十一時十五分左右，肥佬黎終於乘坐七人車返回黎宅，肥佬黎直至深夜先神秘現身，莫非又密謀「攪局」？
卓妮