中環出更：工總55周年 派蛋撻同樂
蛋撻係經典嘅港式小食，香港工業總會為慶祝五十五歲生日，一眾高層尋日下午齊集油塘一間餅店，着上圍裙為一個直徑十二吋、寫上「工」字嘅特別版蛋撻剪綵，同時由尋日朝早九點起，喺全港十二間指定餅店大派五千五百件新鮮出爐蛋撻，實行與眾同樂。講起食蛋撻，各人各有喜好，但共通點係一次過食幾件都冇問題喎！
出席活動嘅包括工總副主席鄭文聰及郭振華，仲有前主席鍾志平（Roy）及孫啟烈等人。
鍾志平一次食三件冇難度
阿Roy帶頭派餅，佢把聲夠晒響，大嗌一聲，即刻吸引街坊排隊拎餅食。派得咁投入，皆因阿Roy係「超級撻迷」，佢話一次過食兩至三件冇難度。但身為澳門人，Roy都係鍾情葡式蛋撻多啲，貪奶味較濃。
商務及經濟發展局局長蘇錦樑（Greg）都有出席，卓妮見佢大大啖食咗件，胃口好似唔錯。蛋撻有牛油皮及酥皮之分，Greg就話獨愛牛油皮蛋撻，因味道香啲，口感又滑啲，一次過食三、四件都面不改容。不過隨住年紀有番甘上下，為免身形發胖，佢話唔敢食太多。
講番個特別版蛋撻，背後製作功臣係一對蛋撻店父子。到底要炮製出絕世好撻，有乜竅門？蛋撻王老闆莊任明話，只要控制好品質，每個過程用心做，唔好出錯，自然會整出好味嘅蛋撻。莊任明兒子莊裕坤就話，跟咗爸爸整餅廿年，真係瞌埋眼都識整。
卓妮