「地球很危險，回去火星吧！」呢句本港電影經典對白至今為人津津樂道。計功夫茶話齋，地球上最危險嘅地方，可能就係由庸官把持嘅香港嘞。呢，最近發生嘅慈雲山車房巨爆慘劇，咪就係當局長期監管失職所致囉。正如「東方報業民意調查」顯示，受訪者一面倒批評當局危機意識不足，規管車房歎慢板，導致都市炸彈遍地開花。
嗱，今次爆炸事故看似偶然，其實必然。相對於全港逾二萬一千架石油氣搵食車，攞正牌更換石油氣車輛氣缸及喉管嘅車房淨得二十九間咁大把，直頭杯水車薪，司機貪平又好，貪方便又好，甚至喺唔知情下光顧非持牌車房又好，出事只爭遲早嘅咋，而今次發生爆炸嘅正正係非持牌車房。所以話啫，今次慘劇點止造成三死九傷，仲「炸」出重大安全隱患添。
非持牌車房梗有一間喺左近，莫講話市民出入提心吊膽，業界亦擔心安全問題，多次要求當局發牌規管。點知你急佢唔急，當局雖然十幾年前已成立工作小組討論有關問題，仲好口響咁話○八年會推出強制註冊時間表添，可惜講完就算，拖到家陣都未有下文。「東方報業民意調查」顯示，四成七受訪者要求盡快強制立法規管，提高安全；兩成五直斥危機意識不足，漠視問題；兩成一批評當局拖字訣，漠視訴求。
機電署為咗敷衍輿論，兩年前仲搞咗一場大龍鳳，推出自願汽車維修工場約章計劃喎，可惜由於冇法律約束力，反應冷淡，得個講字。難怪四成一受訪者直斥如同虛設，規管不足；兩成九批評車房維修如無王管；兩成四認為靠自律，成效不彰。仲有呀，機電署話就話兩年來抽查全港車房五百次，實際只作出一宗檢控咁大把，擺明象徵式做個樣喇。
事實勝於雄辯，本報巡查所見，唔少車房安全意識薄弱，雜物堆到天花板咁高，連危險品都隨地亂放，尤其係唔少車房員工將風煤樽擺放喺店外，仲喺隔籬煲煙，睇見都牙煙。再講吖，家陣約有三成車房位處住宅區內，舊區更出現成條街都係車房，一旦爆大鑊，後果必然慘重。有議員講得啱，當局推出強制註冊仲未夠，長遠應將車房搬離民居，只有解決車房民居混雜情況，先至能夠消除安全隱患，港產官僚收到未呀？
講到尾，香港之所以危機四伏，根本就係官老爺懶懶閒所致。大家有眼見，香港唔係塌樹就係塌樓，唔係冧招牌就係路陷，市民簡直一步一驚心。今次車房巨爆再次敲響警鐘，當局再唔亡羊補牢，遲早慘劇重演嘅咋！