我哋早前率先報道，民主黨（白鴿黨）新東支部早前開會否決前立法會黨員黃成智，代表該黨出選年底舉行嘅區議會選舉，黃成智表明會就此「上訴」，佢尋日出席一個政改論壇後話，今晚會向黨內選舉委員會申述，解釋當日係因為返工而冇開會，其後仲直言「唔選係黨嘅損失」。
講番論壇，黃成智再次講到換取泛民支持政改方案嘅建議，包括中央放寬提名委員會，由公司票變個人票，承諾立法會取消功能界別。
同場嘅工商專聯主席黃友嘉（David）話，中央認為普選涉及國家主權及安全，仲挑戰泛民話假如西藏流亡精神領袖達賴喇嘛話要來港舉行宗教論壇，泛民一向相信宗教自由、國防外交以外嘅嘢唔屬中央規管，憑乜嘢會拒絕對方來港。公民黨黨魁梁家傑反指，泛民候選人會根據制度行事，仲話由於憲制角色，屆時相信會承諾唔去六四晚會。