政情：細個住板間房 李秀恒好熟粗口
香港住屋問題困擾唔少市民，中華廠商聯合會會長李秀恒（Eddy）自爆，細個時同屋企人住板間房，要幾家人共用一個廚房同廁所，一到夜晚大家就粗口滿天飛，又自言當時冇嘢叻，但對粗口好熟悉咁話。
勉年輕人創業要創新
Eddy尋日接受立法會議員蔣麗芸（Ann）嘅網上節目訪問，阿Ann喺節目中介紹Eddy時指對方係住屋邨大，Eddy即刻回應指，「我都好希望住屋邨」，形容細個時同屋企人住嘅屋邨，係四、五百呎嘅屋間咗四、五板間房，佢哋一家住中間嘅板間房連窗都冇，好彩啲木板唔到天花板，先有啲空氣流入嚟，佢仲向阿Ann笑言，「邊有你咁幸福」。
Eddy其後講到踏入社會後，自己畀日本鐘錶公司挖角，佢話雖然後來已經係全公司嘅中國人當中，人工最高嘅人，但佢發現啲老細換嚟換去都係日本人，覺得發展機會有限，所以決定創業，勉勵年輕人想創業，要先積累多啲經驗同要不斷創新。