政情：溫和鴿撐袋謀翻案
民主黨表明反對政改方案，特別係由激進派同乳鴿把持嘅白鴿黨中委會，已決定不理民意企硬反對政改，並先後對支持「袋住先」嘅Dick狄志遠同黃成智發動文革式批鬥。不過班乳鴿嘅做法引起多名本已淡出黨核心嘅溫和派大佬不滿，認為中委會不應喺未經黨大會正式表決授權下，一早就講明會不理民意投票。好明顯，喺黨大會翻案，唔止係白鴿黨溫和派嘅希望，佢哋仲積極拉緊票添。
料於黨大會動議
據了解，不滿黨內激進派做法嘅，除咗有阿Dick同成智，仲有前稱白鴿黨「大腦」嘅羅致光、與阿Dick同屬匯點派嘅李華明、以及現任中常委吳永輝、新界東支部主席周錦紹同前總幹事陳家偉等，佢哋都喺黨內有一定資歷同份量，可以動員到唔少資深黨員投票。據聞溫和派正醞釀喺黨大會提出動議，內容大致係要求該黨嘅立法會議員根據民意嚟對政改投票，變相造反推翻中委會嘅企硬反對立場。
溫和派分析，今次行動有一定成功機會，皆因白鴿黨名義上仲有六、七百名黨員，但實際上仲活躍會參與黨大會投票嘅，來來去去只得二、三百人。其中阿Dick同周錦紹所屬嘅新東支部，以及吳永輝同陳家偉所屬嘅九龍西支部，都有唔少黨員支持「袋住先」。如果爭取到兩名相對溫和嘅現任立法會議員單仲偕同胡志偉支持，預計港島區同九龍東支部亦會有唔少人跟隨。
兩派人數差不多
激進派黨員方面，主要來自AV仁為首嘅新界西支部、黨主席劉慧卿為首嘅原前綫派系、以及分布各區嗰十零隻乳鴿。佢哋雖然喺中委會佔多數，但以黨員人數計算，只係同溫和派平分秋色。所以今次「袋住先」動議能否通過嘅關鍵，就係以張文光及楊森為首嘅教協派系點樣投票。不過無論溫和派今次能否成功「翻盤」，白鴿黨內部都肯定經已四分五裂，退黨潮一觸即發！