中環出更：名人心繫尼泊爾 媽打送祝福
尼泊爾大地震引發嚴重傷亡，唔少港人都有密切留意當地情況，卓妮日前於沙田馬場見到一班政商界名人，佢哋有部分朋友剛好於地震時身處當地，其中民政事務局前常任秘書長「媽打」李麗娟話，平日佢去開嗰間髮型屋，有來自尼泊爾嘅女仔專門幫佢洗頭，早兩個月對方話要返去尼泊爾住，佢仲畀咗封利是諗住祝佢平平安安，點知就發生咗咁大件事。
李麗娟話，該名尼泊爾女仔負責幫佢洗頭洗咗成年，佢好鍾意呢個女仔平日好勤力，為人純樸又可愛，雖然佢唔清楚對方現時在當地係乜情況，但都真心希望佢相安無事。
朋友報平安 鄭錦鐘安樂
保良局前主席鄭錦鐘亦有朋友於事發時身在當地，佢透露有朋友早前捐錢於當地興建一間學校，而地震當日正係該學校剪綵嘅大日子，佢哋當然非常關心，後來佢朋友於Whatsapp群組內報咗個平安，佢哋先當堂放下心頭大石，至於間學校情況點樣，就冇人敢再問落去，總之個人冇事就得喇。
東華三院前總理林李婉冰女兒林嘉寶因為喺外國讀書，同學們都來自五湖四海，咁啱亦有兩位尼泊爾同學，而兩人亦已經唔喺尼泊爾居住，所以唔需要擔心佢哋。
同場仲有太子珠寶鐘錶主席鄧鉅明與太太鄧宣宏雁，其中將於明年踏入六十歲嘅鄧鉅明話，自己好少做劇烈運動，又唔會登山，所以都好少機會去尼泊爾喜瑪拉雅山等地方，又自言年紀大骨頭脆，唔跌得，只能夠緩步跑。
卓妮