日前立法會續辯財政預算案，有議員批評律政司處理「貪曾」前特首曾蔭權及「貪湯」前廉政專員湯顯明貪腐案件時，冇向負責調查嘅廉署提供合適嘅法律意見。
講真，議員詰問「搞咗咁耐都唔知搞成點」──絕對不是無的放矢，更非杞人憂天。事實正如這位議員所指出──有人以為係廉署調查出問題，但其實廉署都要「坐埋一齊」問律政司法律意見，質疑律政司司長係咪受影響，以致未提出檢控，要求削減律政司袁國強一半年薪，共削一百八十五萬元。然而，依老朽看，削年薪一半亦難以諉其過，「絕代雙貪」拖到日月無光，花開又花謝，好歹也應該給市民一個交代，唔嗲唔吊，難道就可以當不存在？
見微知著，特區政府缺乏的是應變的人才！內地打虎，有王岐山呢類應變的大將，是以反貪腐成效超卓，而香港想搵個拍蠅嘅官員，亦難過在大海撈針，此天意令香港繼續沉淪，廉潔繼續蒙污耶？
曾國藩當年奏折，有一道指出道光中末葉，朝政一片鬆垮委靡，官員們只為了自己的利益在生存着；不良者貪污受賄奉迎上司，略有良知者也只「潔身自愛」。曾國藩目光如炬，洞察力厲害，他說：以臣觀之，京官員辦事通病有二：曰退縮，曰瑣屑；外官之辦事通病有二：曰敷衍，曰顢頇……有此四者，習俗相沿，但求苟安無過，不求振作有為，將來一有艱巨，國家必有乏才之患。
曾國藩之奏折，其震撼性是他的預見力。今觀乎律政司司長在「絕代雙貪」一案上，其「法律意見」即使有，恐怕亦顯得畏首畏尾，患上京官與外官之四大通病；香港政改「一定得」？沒有應變的人才怎會得！「絕代雙貪」的膠着，大抵可以預見香港未來好多嘢「會得個吉」！文臣取巧，武臣退縮，國家、社會怎會有運行啊！