政情：勞團被騎劫 集會銷政改
政務司司長林鄭月娥連日奔走宣傳政改，講來講去都係嗰「三幅被」之餘，連勞動節都唔放過。工聯會（工記）尋日朝早發起遊行爭取勞工權益，但去到添馬公園終點就臨時轉場景撐政改，懶神秘嘅林鄭喺冇通知傳媒下，等驟雨都停晒先施施然現身硬銷政改，仲主人家上身帶領工友高叫「二○一七，一定要得」口號。林鄭不但「騎劫」人哋個場，連一句回應工人訴求嘅說話都冇。
有領導層事前毫不知情
不過，對於林鄭神秘現身撐政改，工記內部各有講法，有領導層話事前毫不知情，直至遊行前先知林鄭現身，直言「係林鄭自己要嚟」。工聯會理事長吳秋北就否認係「騎劫」，話呢幾日已經約緊林鄭上台發言，並非事出突然喎。據知後者講法正確，工記本身亦有意邀請林鄭上台配合宣傳，只係籌備時間緊湊，好難通知所有領導層啫。
有泛民主派議員就乘機批評林鄭根本冇資格上台，又話工記應該「騎劫」林鄭支持標準工時立法等，唔應該搭個台畀林鄭宣傳喎。咁又係，工記朝早呢頭就勞工議題向政府「追數」，嗰頭就同林鄭搭晒膊頭宣傳政改，呢門絕技真係唔易o架！