政情：統一勞假公假 工記擦出火花？
工聯會（工記）理事長吳秋北（吳揪得）繼年初漏口風，建議將內地《國安法》條文以附件形式納入《基本法》而連累工記捱轟後，早前佢代表工記討論落實標準工時「撻Ｑ」，更被榮譽會長陳婉嫻訓話指佢唔夠精明，吳秋北事後自言「叫我扮精明我做唔到」。唔知係咪衰開有條路，吳揪得被問到會否支持統一公眾及俗稱勞工假嘅法定假期嘅草案時，口徑又未能統一，同副會長黃國健（KK）各說各話，真係唔知信邊個好。
吳：視乎情況
工黨李卓人向立法會提交私人條例草案，建議法定假期由現時十二日加到十七日，同公眾假期睇齊；工記自從去年底因為冇投票支持落實七日男士侍產假而搞到滿城風雨後，佢哋就勞工議題嘅投票取向自然成為焦點。但身兼勞工顧問委員會僱員代表嘅吳揪得就話，所有勞工政策都係經勞顧會醞釀，統一公眾假期日數應該先喺勞顧會達成共識，再擺上立法會討論，所以工記會唔會支持法案要視乎情況喎。
黃：原則上撐
不過，身兼立法會議員嘅KK態度就正面得多，話原則上支持一步到位統一假期日數，只要李卓人唔好喺草案「塞咁多政治嘢」，工記六票都會投支持，唔會提修訂阻撓。究竟工記支唔支持法案，除咗對佢哋嘅誠信一大考驗外，佢哋就勞工立場口徑不一，睇怕會係更加大嘅考驗。
雖然工記內部對勞工議題未夾定口供，但已為議員王國興（阿王）嘅「收皮論」解圍，立場仲好一致添。KK解釋「收皮」的確唔係斯文人、上流社會講嘅語言，但阿王係「基層工會嘅代表」，所以講基層啲嘅語言冇咩問題喎。如果係咁，點解唔講埋粗口呢？吳揪得更加愈講愈興起，佢批評學生講晒粗口都冇人要佢哋道歉，阿王只係講句俚語就要道歉，係咩世界？認真天大冤情喎！